Aguesta setmana s’an complit es prumèrs 100 dies dera prenuda de possession des còssos elèctes escuelhudi enes passades eleccions municipaus deth 24 de mai de 2015. Frut d’aguestes eleccions, e per prumèr còp dempús dera restauracion dera democracia, en pòble de Les, ua nauèra tresau fòrça politica artenhie representacion en Consistòri, en tot formar atau eth Plen municipau mès plurau dera istòria recenta e trencar damb eth bipartidisme ac qu’èrem acostumadi. Son es dus còssos de CORRÒP-Les.
Desde de Corròp èm prigondaments satisfèts d’auer obtengut representacion. Era lista “cremalhèra” de Corròp-Les (unica lista paritària des que concorreren as eleccions municipaus) obtenguec dus Còssos, en tot poder atau, conformar eth solet grop municipau paritari der Ajuntament de Les. Com ja podéretz veir ena campanha electorau, Corròp dèc ua importància prioritària ara igualtat e trabalharam ath long de tot eth mandat en favor d’aguest principi tan simple, just, etic e democratic com ei era igualtat entre òmes e hemnes, ens institucions e enes politiques que gessen d’eres.
Aguest nau Plen der Ajuntament de Les, tot e éster mès plurau, contunhe damb majoria absoluta deth grop municipau d’Unitat d’Aran e, per tant, ena practica, aguest ei eth grop municipau que hè a valer era sua majoria absoluta (quate Còssos) entà préner unilateralment totes es decisions. Eth Plen ei pòc mès qu’un lòc a on se da compde de çò qu’eth govèrn municipau a decidit.
Corròp ei ua formacion politica assembleària, que base era prenuda de decisions ena participacion democratica de toti es vesins e vesies de Les. Sense cap sòrta de dobte, era forma en que pren es decisions eth grop municipau d’Unitat d’Aran ei era diferéncia ideologica mès notabla qu’auem pogut constatar pendent aguesti prumèrs 100 dies. Ja en discors d’investidura, eth Baile expliquèc qu’era sua manèra de compréner eth govèrn locau non depenie de melhorar era participacion ciutadana, en tot afirmar qu’es vesins e vesies de Les non volien èster “shordadi” damb consultes e d’autes mòdes de participacion. Eth Baile auie d’éster executiu.
Corròp non cre en aguesta manèra de hèr, e contunharam de trabalhar entà melhorar era participacion ciutadana. Jamès auem creigut en un vòt delegat pendent quate ans a ua formacion politica, tà nosati ei imprescindible qu’es vesins e vesies de Les poguen participar e opinar ena prenuda de decisions der Ajuntament, e encara mès quan se tracten ahèrs que pòden mèrcar eth futur deth municipi o despenses economiques e inversions nautes.
Non serie just díder qu’er actuau govèrn municipau non a atengut cap des nòstes demandes e/o suggeriments, donques pendent aguesti 100 dies an iniciat eth procès d’implementacion dera web de transparéncia, an melhorat era informacion ciutadana des accions municipaus mejançant es hilats sociaus (sonque actes sociaus qu’an agut lòc en Les), e an acceptat era incorporacion de Còssos dera oposicion en Conselh directiu dera Societat Limitada Iniciatiues Vila de Les. Desde Corròp felicitam ar Ajuntament pera adopcion d’aguestes mesures que nosati proposèrem, e l’encoratjam entà que contunhe de trabalhar per aguest camin, sustot en ahèr dera transparéncia.
Mès era realitat d’aguesti 100 dies a estat qu’auem agut eth sentiment qu’er actuau equip de govèrn mos a dificultat eth liurament dera informacion sollicitada (en tot dar responsa as nòstes peticions d’informacion dehòra de termini, e quitament, en tot non dar responsa a bèra ua d’eres) e que ua practica qu’aurie d’éster normau se torne “periodisme d’investigacion” entà sajar de saber quini projèctes i a, com van e com se hèn es causes en Les.
Dera madeisha manèra, auem vist pendent aguesti 100 dies qu’era majoria de decisions se prenen laguens deth conselh de govèrn locau, format sonque per còssos d’UA e damb totes es competéncies delegades peth Plen municipau que permet era lei. E donques, arren a cambiat en Les, auem era madeisha forma de governar qu’enes darrèrs 28 ans. Un govèrn barrat, que pren es decisions unilateralment, format sonque per òmes, pòc transparent e damb escasses politiques de comunicacion e informacion des sues decisions ara ciutadania… fin finau, eth vielh govèrn d’UA que ja hè mès de 10.000 dies que dure.
Eth prètzhèt d’oposicion que Corròp a hèt aguesti prumèrs 100 dies non a estat bric facil. Auem sajat de méter en practica es compromisi programatics dera campanha mejançant era entrada de mocions en Plen municipau, mès sonque se mos a acceptat ua mocion d’acuelhuda as refugiadi. Era majoria d’UA a refusat ua mocion que demanaue mès transparéncia en Ajuntament e un auta que demanaue arturar eth projècte de circolacion de mòtos pes bòsqui e camins de Les enquià que non i auesse debat public entre es vesins e vesies, que son es qu’aurien de trigar se vòlen o non un projècte atau, damb ua consulta populara. Se ben es manères autoritaries non cambien, era oposicion òc qu’a cambiat, ara ei mès actiua e explique as ciutadans tot çò que se passe en Ajuntament.
Pendent aguesti darrèrs 100 dies, Corròp a convocat periodicaments assemblades ciutadanes dubèrtes a toti e totes, e aguestes amassades an estat er estrument basic de prenuda de decisions entara votacion des ahèrs tractats enes Ples, mès tanben entà portar-i ahèrs que preocupen as vesins e vesies de Les. A peticion vòsta auem preguntat sus eth projècte d’ampliacion dera peirèra de Cledes, denonciat er estat des airaus infantius e demanat era intervencion municipau entà melhorar eth civisme enes parcatges en pòble. Pòc harà er Ajuntament en aguesti ahèrs.
Dera madeisha manèra, auem potenciat tant com auem pogut era nòsta politica d’informacion e comunicacion, en tot publicar resumits de totes es decisions prenudes enes Plens municipaus, grabar-les en video, atau coma en tot hèr publiques damb anterioritat es mocions que Corròp i a presentat. Lamentam que non sigui er Ajuntament eth qu’informe publicaments de totes es accions municipaus, nosati insistiram entà qu’atau sigue e se poguen crear espaci de participacion ciutadana. Mentretant nosati contunharam damb eth nòste déuer d’informar eth conjunt dera ciutadania deth dia a dia dera nòsta politica municipau e preneram es decisions com enquiara: de baish tà naut, en tot escotar e en tot debàter damb toti es vesins e vesies que participen en es nòstes assemblades. Vos i demoram!
corrop.wordpress.com 