Amassada damb eth Síndic d’Aran: eth fuerte, era escòla d’ostalaria e er enduro en Les
Despús des reiterades queishes de vesins e toristes sus er estat deth parc deth “fuerte” de Les anèrem, prumèr, a demanar informacion sus er estat der ahèr en Ajuntament de Les, que mos informec qu’auie enviat ua carta ath Conselh Generau d’Aran, propietari des terrens, entà qu’aguest accelère es trabalhs de limpiesa e reconstruccion der equipament.
Desde CORRÒP ja auem manifestat tot soen era nòsta voluntat de dialòg e de trabalh entà establir/recuperar es pònts de comunicacion e cooperacion entre era administracion locau e eth govèrn d’Aran, ei pr’amor d’aquerò que dimercles 5 d’agost mos amassèrem damb eth Sr. Carlos Barrera, Síndic d’Aran, en Vielha.
En ordre deth dia plantegèrem 3 ahèrs importants entath pòble, ahèrs que formen part deth programa electorau que mos comprometèrem a complir enes passades eleccions:
1. Er estat deth parc deth “fuerte”;
2. Era escòla d’ostalaria e es edificis cedits pera Generalitat de Catalonha ath Conselh Generau d’Aran;
3. Eth projècte d’enduro presentat en CGA a peticion des Ajuntaments de Les e Canejan.
1. Parc deth “fuerte” de Les
Er equipament se tròbe en un estat lamentable despús des aiguats deth 2013. I manquen es baranes de seguretat e era èrba a posat enquià hèr impracticables es terrens de jòc entara mainadèra. Damb era arribada dera tempsada d’estiu diuèrsi toristes s’an queishat as otèls deth pòble deth sòn estat. Mares e pares, vesies e vesins de Les, hè temps, 2 ans, que se queishen d’auer perdut un equipament entath pòble.
Eth Síndic, mos expliquèc que sonque hè 2 mesi qu’era Generalitat auie cedit er espaci ath CGA, e qu’era partida pressupòstaria entà apariar er equipament serà lèu dada (corresponenta ara assegurança crobada pes aiguats).
Se comprometèc a començar es òbres antes de finaus deth mes d’agost. Aguestes òbres includisen trabalhs d’ajardinament, era construccion d’ua paret de pèira entà separar eth parc des jardins e era restitocion des proteccions ath cant der arriu Garona. Ara seguida, un còp apariat, ei era voluntat deth CGA cedir er espaci ath pòble de Les.
Eth grop municipau de CORRÒP-LES demanèc auer informacion sus era auança des gestions entà transméter-la as vesies e vesins deth pòble.
2. Escòla d’Ostaleria e edificis annexes
Demanèrem peth projècte qu’eth CGA a previst enes edificis A e B deth conjunt qu’aué aucupe en part er Institut d’Ostalaria d’Aran. Se ben hè un temps i auie un projècte entara implantacion d’estudis de fisioterapia, a peticion dera Universitat de Girona, ara madeish aguesta institocion ja non i é interessada.
Eth CGA a contactes damb era Universitat de Lhèida entara dubèrtura d’estudis relacionadi damb eth torisme, era montanha e es servicis, mès non i a cap projècte concretat encara.
Eth grop municipau de CORRÒP-LES demanèc auer informacion de prumèra man e poder participar en procés de decision sus eth futur des edificis.
3. Projècte d’enduro enes camins de Les
Auiem coneishença deth projècte desde hè quauqui mesi, mès ei sonque despús dera nòsta entrada en Ajuntament de Les qu’auem sabut qu’en passat mandat eth Plen de Les aprovèc per unanimitat un projècte entà permeter era circolacion de grups d’enduro pes camins de Les. Aguest acòrd se transformèc en un projècte que s’a enviat ath CGA e qu’ara ei en fase d’estudi entà veir es afectacions qu’aguesta activitat grupau pòt auer entara poblacion, es camins e era fauna e flora de Les.
Desde CORRÒP-LES pensam qu’aguesta activitat ei deth tot incompatible damb eth torisme familiar, er excorsionisme, es activitats de descubèrta dera natura e eth trailrunning, activitats qu’ara per ara formen part dera aufèrta deth pòble de Les e pes que s’apòste coma activitats de futur entà desestacionalitzar eth torisme e trencar era dependéncia damb eth comerç e eth torisme de termièra.
Eth CGA mos facilitarà ua amassada damb es tècnics ambientaus entà veir es afectacions. Auem tanben entrat ua sollicitud en Ajuntament de Les entà consultar tota era informacion deth projècte.
Aguest serà sens dubte, un des ahèrs der ordre deth dia dera pròplèu Assemblada dubèrta, qu’aurà lòc eth dimenge 23 d’agost pera tarde, e ara que vos convidam a díder era vòsta.
Era amassada damb eth Síndic acabèc damb er acòrd de hèr amassades periodiques entà tractar ahèrs que preocupen ath pòble e entà recuperar canaus de comunicacion normaus, de tu a tu, entre eth pòble e eth govèrn d’Aran.
corrop.wordpress.com 