ETH MUSEU DETH HARO E ETH CAT D’ESCAMUN

Aué s’a presentat eth projècte deth Museu deth Haro que demanauem en nòste programa electorau, damb era presencia deth Conselher de Cultura, eth Sindic d’Aran e eth Baile de Les e d’auti cargues que collabòren en aguest projècte.
Consideram qu’era iniciatiua ei molt positiua entath pòble e sustot entà reviscolar era sua part vielha (Era Carrèra e Savièla). Se plaçarà en antic edifici dera crasta dera plaça deth Haro e eth dessenh l’a hèt ua oficina d’arquitectes de Les. Eth projècte presentat aué ei ua prumèra fasa, que poderie convertisse en un gran centre culturau se s’apariessen es cases des de Janeta que son darrèr dera crasta. En aguest sentit, pensam qu’er Ajuntament de Les a perdut era oportonitat d’invertir en aguest projècte estrategic entath pòble.
Es sòs i son, més s’a apostat, damb era nòsta oposicion, per gastar-les en projècte deth CAT ena gessuda deth pòble (Escamun).
Pensam qu’era decision d’urbanitzar e bastir naues zònes deth pòble en lòc de reviscolar eth centre e apostar peth comerç e es servicis existenti ei un grèu error estrategic.
Eth projècte deth que vos parlam non ei sonque eth CAT, centre d’atencion toristica, va mès eilà e amague eth benefici privat. De hèt, ei era excusa entà crear ua nauèra zòna comerciala qu’aurà un otèl, diuerses bastides comerciaus, viuendes e parcatges.
Auem parlat d’aguest ahèr diuersi còps en Plen der Ajuntament, sense que se mos volgue escotar. Ara demanam as vesins e vesies de Les que parlen, que se queishen e qu’apòsten peth centre deth pòble e per un projecte culturau que portarie molt torisme entara plaça deth Haro. Entad’açò començaram ua recuelhuda de signatures entà demanar ar Ajuntament que pense en toti es vesins e vesies e hèsque projèctes de futur tà Les, en tot apostar pera cultura, eth comerç e eth torisme en centre deth pòble, e non per modeus de desvolopament urbanistic que non an cap sentit.

Recreacion deth Musèu deth Haro

Plànol deth Musèu deth Haro

Plànol deth complex d’Escamun

 

Plen ordinari (04/03/2016): Mireia renoncia ath cargue de Còssa, hèira dera oelha aranesa e #WelcomeRefugees.

Eth passat deluns auérem Plen en Ajuntament, un d’especiau per 2 motius.

• Prumèr, era còssa Mireia Boya renoncièc ath cargue, en tot passar eth testimòni ara nòsta nº3 ena lista, Imma Maymús. Ja sabetz que nosati non credem ena duplicitat de cargues e qu’arrés ei imprescindible. Era politica tà nosati ei un servici public, non ua profession, e ara a Mireia l’auem en Parlament, a on de plan segur defenerà es interèssi d’Aran e de Les.

• Dusau, per decision unanima des grops UA e CORRÒP eth drapèu dera UE ei a miei lheuar en balcon der Ajuntament. Protestam per acòrd UE-Turquia e es deportacions des refugiadi qu’arriben tà Grècia. En Les èm un pòble d’acuelhuda e didem #WelcomeRefugees.

• Ath delà, se mos presentèc era liquidacion des compdes deth 2015 e siguec acceptada ua peticion nòsta entà recuperar era hèira dera oelha aranesa en Les, a on se celebrèren es prumères edicions. Tanben preguntèrem per dus projèctes en pòble: era residéncia entara gent grana ena bastissa dera vielha residéncia de temps liure e es òbres de condicionament deth parc de “eth fuerte”. Daram seguiment as dus, e pressionaram entà auer-les lèu en pòble!

Plen extraordinari: Modificacion deth pressupòst 2015 e manifèst contra era violéncia de genre.

Eth passat diuendres 27 de noveme hérem un Plen extraordinari entara modificacion deth pressupòst municipau 2015 e era aprobacion d’ua declaracion institucionau contra era violéncia de genre, damb era pressència des còssos d’UA e de CORRÒP-Les.

 

En prumèr punt, de modificacion deth pressupòst, s’an ampliat diuerses partides entà pagar es actuacions sus era illuminacion deth pòble, retorn de part dera paga extra deth 2012 e pagament de partides diuerses damb crèdit insuficient. Son es que seguissen:

 

Suplement de crèdits: s’amplie perquè eth crèdit previst non ei suficient

Denominacion partida	Pressupòst previst	Crèdit ampliat	Explicacion
Devolucion paga extra funcionaris 2012	781,93	853,16	Paga congelada en 2012 que se torne pòc a pòc
Devolucion paga extra laborau 2012	1983,69	2.164,4	Paga congelada en 2012 que se torne pòc a pòc
Arrendament tècnic e mobiliari	3.000	2.000	Maquines, lums de Nadau…
Ocupacion terrens publics	3.000	1.000	Loguer parcatge Paisàs e Era Carrera. Indemnitzacion pas via ferrata. Loguer prat dipòsit Caubèra
Subministrament energia	55.000	10.000	Cambi facturacion Fecsa-Endesa
Despeses oficina	2.000	800	Materiau/fotocòpies
Publicitat e propaganda	2.000	2.000	Publicitat actes (heires, etc).
Boletin oficiau anoncis	700	1.500	Anoncis projèctes
Despeses juridiques	16.000	16.000	Contenciosi dubèrts en an o que an ressolucion (CAT, etc).
Activitats toristiques	5.000	3.000	Les & Fun, Còr d’Aran
Accion sociau	3.000	2.000	Subvencion ICD
Activitats esportiues	3.000	2.000	Trail Carlac, Raid Aran
Redaccion projèctes	5.000	10.000	Projèctes òbres
Plans proteccion e emergéncia	2.000	2.000	Revison Plan emergència
Totau		55.317,56

 

Crèdits extraordinaris: no i auie crèdit pressupòstat

Denominacion partida	Crèdit extraordinari	Explicacion
Indemnitzacions e franquicies	2.000	Indemnitzacions per accidents pòda arbres
Enlumenat public	52.843,42	Projecte de cambi a leds der enlumenat. Er Aj. Paga eth 50% e Dept. Territòri eth 50%
Totau	54.843,52

Er Ajuntament de Les a un remanent de tresoreria de 627.000 euros, ei d’acieu que se tren es sòs entà pagar aguesta modificacion deth pressupòst, que puge a 110.161,08 euros.

Es còssos de CORRÒP-Les auem preguntat sus es activitats e projèctes pagadi damb aguesta ampliacion, sus eth foncionament deth pressupòst municipau en marc des leis qu’obliguen ara estabilitat pressupostaria e eth calendari entà aprobar eth pressupòst deth 2016.

Díder que tot e qu’er Ajuntament a un remanent positiu de 627.000 euros aguesti sonque se pòden gastar en servicis basics o projèctes de caracter sostenible o projèctes entà evitar maus majors, e que tostemp cau preservar era estabilitat presupòstaria, çò que vò díder que, de bèra forma, es Ajuntament son obligadi a estauviar e non pòden gastar eth remanent positiu en çò que vòlen.

Auem sollicitat un còp mès er estat d’execucion deth pressupòst, entà auer un contròl trimestrau des compdes e tanben eth catalòg de lòcs de trabalh, entà saber qui e com trabalhe ena nòsta institucion.

Entath pressupòst 2016 auem demanant que se tenguen en compde desde bon començament quauqui projèctes ja consolidadi, coma er hestivau Les&Fun o era corsa Trail Carlac. Tanben auem auferit era nòsta collaboracion entà pactar un pressupòst que recuelhe es demanes des vesins e vesies de Les e quemos an hèt arribar. Ei era nòsta voluntat qu’es pressupòsti deth 2016 en Les siguen particupatius e que toti e totes poguesquem díder era nòsta! Era aprobacion ei prevista entà gèr/hereuèr en un aute Plen extraordinari deth que vos en daram compde.

Eth nòste vot a estat ua abstencion ara modificaion, donques encara non èrem en Plen municipau en què s’aprovèc eth pressupòst 2015.

 

En dusau punt, er Ajuntament de Les a aprobat per unanimitat era manifest contra era non violéncia de genre der Institut Català de les Dones. Le podetz consultar acieu:

http://dones.gencat.cat/web/.content/04_temes/docs/manifest25n.pdf

 

Lèu vos convocaram tà ua naua assemblada entà parlar sus es punts que voletz que presentesquem en pròplèu Plen deth 21 de deseme. Vos i demoram!

Enduro

Dempús des problèmes entre es mòtos e es vesins e vesies de Les era passada dimenjada, damb planhs de caçaires, pagesi e excursionistes qu’enquià aqueth moment desconeishien eth projècte d’autoritzacion de grops d’enduro pes montanhes aprovat per Ajuntament de Les, mos dèishe estonadi qu’era reaccion d’Unitat d’Aran sigue méter era dirècta e sollicitar ath Conselh Generau d’Aran aprovar un plan d’usatges enes montanhes, en tot barrar era pòrta ath debat e ara reflexion collectiva sus eth futur des nòstes montanhes.

Un còp mès demanam un procès d’informacion publica e ua consulta populara entà decidir toti sus un projècte qu’afècte a tanta gent e qu’es quate vòts des còssos d’UA en Les an amiat entà deuant en tot ignorar era nòsta mocion en aguest sentit. Sense dialòg non anam enlòc.

Renóncia ath privilègi deth forfait de Baqueira-Beret

Es còssos, conselhèrs e bailes aranesi, e d’auti cargues publics e privadi, gaudissen deth privilègi d’auer un forfait nominatiu entà tota era sason en Baqueira-Beret. En cas des còssos de CORRÒP-Les, eth prètz que se mos aufrís ei de solament 32 èuros, quan eth prètz d’adult ei de 690 euros.

Damb aguest comunicat volem hèr publica era nòsta renóncia a tot privilègi que sigue per hèt d’èster cargue elècte e que pogue significar un tracte de favor, donques consideram qu’ei ua despensa innecessària e un grèuge comparatiu respècte era rèsta de ciutadania.

Pensam qu’eth prètz deth forfait entà toti es vesins e vesies d’Aran aurie d’èster eth madeish, entà evitar discriminacions per arrason d’empadronament, e pro baish entà evitar era discriminitzacion des familhes de renda mès baisha e elititzacion d’aguest espòrt d’iuèrn. Non volem participar d’aguesti tractes de favor, les consideram innecessaris e provòquen un grèu aluenhament vèrs es interèssi des classes populars e era ciutadania en generau.

Atau madeish, e en tot seguir damb era volontat d’impulsar un procès de regeneracion politica, era agropacion municipau anóncie que tanben renonciarà a tot present que les volgue aportar quina enterpresa privada que sigue. En cas de non poder renonciar-i, era prioritat serà era cession des presents as entitats sociaus que trabalhen damb persones damb risc d’exclusion; en cap cas demoraràn enes mans des còssos.

A trauès d’aguest posicionament, era fòrça politica vò hèr evident eth sòn compromís collectiu entara defensa der interès generau dera ciutadania peth dessús de quinsevolh interès personau, privat o partidista.

Les, 22 d’octubre de 2015

10.000 dies de vielh govèrn municipau, 100 dies de nauèra oposicion.

Aguesta setmana s’an complit es prumèrs 100 dies dera prenuda de possession des còssos elèctes escuelhudi enes passades eleccions municipaus deth 24 de mai de 2015. Frut d’aguestes eleccions, e per prumèr còp dempús dera restauracion dera democracia, en pòble de Les, ua nauèra tresau fòrça politica artenhie representacion en Consistòri, en tot formar atau eth Plen municipau mès plurau dera istòria recenta e trencar damb eth bipartidisme ac qu’èrem acostumadi. Son es dus còssos de CORRÒP-Les.
Desde de Corròp èm prigondaments satisfèts d’auer obtengut representacion. Era lista “cremalhèra” de Corròp-Les (unica lista paritària des que concorreren as eleccions municipaus) obtenguec dus Còssos, en tot poder atau, conformar eth solet grop municipau paritari der Ajuntament de Les. Com ja podéretz veir ena campanha electorau, Corròp dèc ua importància prioritària ara igualtat e trabalharam ath long de tot eth mandat en favor d’aguest principi tan simple, just, etic e democratic com ei era igualtat entre òmes e hemnes, ens institucions e enes politiques que gessen d’eres.
Aguest nau Plen der Ajuntament de Les, tot e éster mès plurau, contunhe damb majoria absoluta deth grop municipau d’Unitat d’Aran e, per tant, ena practica, aguest ei eth grop municipau que hè a valer era sua majoria absoluta (quate Còssos) entà préner unilateralment totes es decisions. Eth Plen ei pòc mès qu’un lòc a on se da compde de çò qu’eth govèrn municipau a decidit.
Corròp ei ua formacion politica assembleària, que base era prenuda de decisions ena participacion democratica de toti es vesins e vesies de Les. Sense cap sòrta de dobte, era forma en que pren es decisions eth grop municipau d’Unitat d’Aran ei era diferéncia ideologica mès notabla qu’auem pogut constatar pendent aguesti prumèrs 100 dies. Ja en discors d’investidura, eth Baile expliquèc qu’era sua manèra de compréner eth govèrn locau non depenie de melhorar era participacion ciutadana, en tot afirmar qu’es vesins e vesies de Les non volien èster “shordadi” damb consultes e d’autes mòdes de participacion. Eth Baile auie d’éster executiu.
Corròp non cre en aguesta manèra de hèr, e contunharam de trabalhar entà melhorar era participacion ciutadana. Jamès auem creigut en un vòt delegat pendent quate ans a ua formacion politica, tà nosati ei imprescindible qu’es vesins e vesies de Les poguen participar e opinar ena prenuda de decisions der Ajuntament, e encara mès quan se tracten ahèrs que pòden mèrcar eth futur deth municipi o despenses economiques e inversions nautes.
Non serie just díder qu’er actuau govèrn municipau non a atengut cap des nòstes demandes e/o suggeriments, donques pendent aguesti 100 dies an iniciat eth procès d’implementacion dera web de transparéncia, an melhorat era informacion ciutadana des accions municipaus mejançant es hilats sociaus (sonque actes sociaus qu’an agut lòc en Les), e an acceptat era incorporacion de Còssos dera oposicion en Conselh directiu dera Societat Limitada Iniciatiues Vila de Les. Desde Corròp felicitam ar Ajuntament pera adopcion d’aguestes mesures que nosati proposèrem, e l’encoratjam entà que contunhe de trabalhar per aguest camin, sustot en ahèr dera transparéncia.
Mès era realitat d’aguesti 100 dies a estat qu’auem agut eth sentiment qu’er actuau equip de govèrn mos a dificultat eth liurament dera informacion sollicitada (en tot dar responsa as nòstes peticions d’informacion dehòra de termini, e quitament, en tot non dar responsa a bèra ua d’eres) e que ua practica qu’aurie d’éster normau se torne “periodisme d’investigacion” entà sajar de saber quini projèctes i a, com van e com se hèn es causes en Les.

Dera madeisha manèra, auem vist pendent aguesti 100 dies qu’era majoria de decisions se prenen laguens deth conselh de govèrn locau, format sonque per còssos d’UA e damb totes es competéncies delegades peth Plen municipau que permet era lei. E donques, arren a cambiat en Les, auem era madeisha forma de governar qu’enes darrèrs 28 ans. Un govèrn barrat, que pren es decisions unilateralment, format sonque per òmes, pòc transparent e damb escasses politiques de comunicacion e informacion des sues decisions ara ciutadania… fin finau, eth vielh govèrn d’UA que ja hè mès de 10.000 dies que dure.
Eth prètzhèt d’oposicion que Corròp a hèt aguesti prumèrs 100 dies non a estat bric facil. Auem sajat de méter en practica es compromisi programatics dera campanha mejançant era entrada de mocions en Plen municipau, mès sonque se mos a acceptat ua mocion d’acuelhuda as refugiadi. Era majoria d’UA a refusat ua mocion que demanaue mès transparéncia en Ajuntament e un auta que demanaue arturar eth projècte de circolacion de mòtos pes bòsqui e camins de Les enquià que non i auesse debat public entre es vesins e vesies, que son es qu’aurien de trigar se vòlen o non un projècte atau, damb ua consulta populara. Se ben es manères autoritaries non cambien, era oposicion òc qu’a cambiat, ara ei mès actiua e explique as ciutadans tot çò que se passe en Ajuntament.
Pendent aguesti darrèrs 100 dies, Corròp a convocat periodicaments assemblades ciutadanes dubèrtes a toti e totes, e aguestes amassades an estat er estrument basic de prenuda de decisions entara votacion des ahèrs tractats enes Ples, mès tanben entà portar-i ahèrs que preocupen as vesins e vesies de Les. A peticion vòsta auem preguntat sus eth projècte d’ampliacion dera peirèra de Cledes, denonciat er estat des airaus infantius e demanat era intervencion municipau entà melhorar eth civisme enes parcatges en pòble. Pòc harà er Ajuntament en aguesti ahèrs.
Dera madeisha manèra, auem potenciat tant com auem pogut era nòsta politica d’informacion e comunicacion, en tot publicar resumits de totes es decisions prenudes enes Plens municipaus, grabar-les en video, atau coma en tot hèr publiques damb anterioritat es mocions que Corròp i a presentat. Lamentam que non sigui er Ajuntament eth qu’informe publicaments de totes es accions municipaus, nosati insistiram entà qu’atau sigue e se poguen crear espaci de participacion ciutadana. Mentretant nosati contunharam damb eth nòste déuer d’informar eth conjunt dera ciutadania deth dia a dia dera nòsta politica municipau e preneram es decisions com enquiara: de baish tà naut, en tot escotar e en tot debàter damb toti es vesins e vesies que participen en es nòstes assemblades. Vos i demoram!

OPORTUNITAT PERDUDA ENTÀ REDUIR ES CARGUES ECONOMIQUES DES VESINS E VESIES DE LES

Eth deluns 21 de seteme auèc lòc un Plen ordinari en Ajuntament de Les. Sabem qu’er orari non ei adaptat ara gent que trabalhe, pr’amor d’aquerò que mos comprometem a hèr un resum complet de tot çò que s’aprovèc

1. Marcos Boya, de CDA, prenec possession de cargue de còsso. Benvengut!
2. S’aproven es actes anteriors. Hug de la Rosa hèc eth comentari de cuedar un shinhau mès er usatge d’un lenguatge non sexista.
3. Se dèc compde des Decrets de Bailia, que son aqueri que relacionadi damb es nomenaments des cargues, e tinents d’alcalde aprovats enes Plens anteriors.
4. S’aprovèc damb es vòts a favor d’UA e es vòts en contra de CORRÒP-LES e CDA era pujada deth coeficient der Impost de Bens Immòbles (IBI), que passe de 0,55 a 0,67.

Er IBI ei un impòst regulat pes Ajuntaments qu’a un objectiu recaudatòri. Eth coeficient aplicat se pòt botjar en uns marges e s’aplique ath valor cadastrau des finques (que fixe eth cadastre). Enguan aguest valor cadastrau s’a rebaishat en un 23%. Ei p’amor d’açò qu’er equip de govèrn d’UA, entà conservar es ingressi der Ajuntament, a aprobat ua pujada deth coeficient deth 22%. Era repercossion enes vesins e vesies? Bèri uns veiratz ua petita baishada en çò que pagats perqué non totes es cases paguen igual, mès era majoria veiratz coma pagatz eth madeish IBI per ua propietat qu’a un 23% mens de valor cadastrau.

Tà CORRÒP a estat ua oportunitat perduda entà qu’era gent age mens cargues impositives. Era pujada entà mantier es ingressi der Ajuntament e assegurar atau es servicis ath pòble s’aurie podut repartir en d’auti impòsti, s’aurie podut estudiar ua reduccion de despenses e s’aurie podut hèr graduau en temps.

CORRÒP a demanat que siguen tengudes en compte ua serie de bonificacions, entàs familhes damb renda mès baisha deth pòble (monoparentals, numeroses, pension minima…), mès eth govèrn locau non a volut entrar en debat entà establir criteris. Se beth un ei afectat qu’ac demane e s’estudiarà. Non sabem ben ben com se prenerà era decision.

CORRÒP ha demanat tanben qu’aqueri terrens urbans qu’an un usatge de uart non patisquen era pujada deth coeficient der IBI e consèrven eth 0,55. Aguesta propòsta tanpòc a estat acceptada, en tot considerar qu’es uarts son edificables, causa que mos semble pòc lògica enes temps enes que viuem, damb ua crisi immobiliaria qu’a mostrat que s’a bastit massa.

Er istòric der IBI ei:

2012 – 381.466,23

2013 – 419.932,09

2014 – 389.020, 81

2015 – 392.859,53

Com vedetz, i auie marge entà qu’era quòta non afectèsse as vesins e vesies de Les en tot mantier uns ingressi acceptables.

5. Era taxa de subministrament d’aigua puge un 5,71% damb es vòts a favor d’UA e es vòts en contra de CORRÒP e CDA. Un còp mès era carga impositiua què enes familhes. Era pujada ei justificada entà UA perquè era recaptacion non cobrís es despenses actuaus deth servici de subministrament d’aigua e perquè era darrèra modificacion siguec en 2009. Tà CORRÒP ei encara mès grèu quan en pressupòst non se preven servicis de milhora e se parle de qu’era pujada afectarà principauments as viuendes.
6. Es hèstes locaus en 2016 seran eth 29 de junh e eth 6 d’octobre.
7. Eth govèrn de Les a accedit ara modificacion deth conselh d’administracion dera empresa Iniciatiues Vila de Les SL, e inclodís a Hug de la Rosa (CORRÒP) e Marcos Boya (CDA). Felicitam ar equip de govèrn per aguest cambi de política que de ben segur contribuirà ara major transparència e accès ara informacions d’aguesta empresa locau.
8. Adhesion per unanimitat ar informe dera ponència deth Senat a favor des municipis de montanha.

Es nòstes mocions:

9. Aprobacion per unanimitat de dues mocions ath torn dera crisi de refugiadi. Er Ajuntament de Les collaborarà damb totes es institucions en tot oferir era antiga residència de temps liure entara acuelhuda temporau de refugiats, participarà en hilat de pòbles d’acuelhuda e coordinarà possibles familhes d’acuelhuda e eth trabalh damb es entitats d’ajuda.
10. Se desestime era mocion de CORRÒP que demane mès transparència e accès ara informacion. Auem rebrembat qu’era Lei de transparéncia ei vigenta e qu’er Ajuntament ei obligat a dar ua informacion que ja de per si solet aurie de dar. Auem agraït es milhores en aguest ambit e era bona volontat der Ajuntament, mès rebrembam que seram observadors, donques fòrça informacion non ei accessible ath ciutadan e non existís ua politica de comunicacion des decisions der Ajuntament qu’afècten as vesins e vesies de Les. Haram eth listat des causes qu’encara non son publiques e n’aurien d’éster. Eth Baile, a rebrembat que complirà era Lei “tant coma pogue”. Demoram que la complisque tota…
11. Es vòts d’Unitat d’Aran s’opòsen ara arturada immediata deth projècte de circulacion de mòtos d’enduro pes bòsqui e camins de Les. Desde CORRÒP auem argumentat qu’aguest ei un projècte que non a estat informat as vesins e vesies de Les, que non a estat debatut e que non compde damb er estudi de mercat ne es informes de torisme de besonh entà demostrar qu’ei compatible damb d’autes activitats de mens impacte que ja son presentes en Baish Aran (caça, pesca, observacion de fauna, ecoturisme, BTT, running, misharnons, etc.).

CORRÒP sonque demanaue un procès participatiu d’informacion e debat entà qu’es vesins e vesies de Les e es grop directament afectadi poguessen informar-se e decidir liurements era convenença sociau, economica e mabientau d’aguest projècte d’interès generau. Un debat qu’aurie d’acabar en ua consulta.

Des der equip de govèrn s’a descartat era convennença des consultes, donques “ei er Ajuntament eth que decidís e non se pòt hèr a decidir ara gent sus causes que non coneish”. Lamentam era actitut pòc dialogant der equip de govèrn. Auram ua pròba-pilat de 2 ans entà veir com va, e dilhèu eth modèu toristic deth Baish Aran ja serà tocat.

12. Preguntèrem per escrit sus eth manteniment de parcs, sus es parcatges incivics e sus eth projècte d’ampliacion dera peirèra de Cledes. Ara ja auem aprenut qu’es respòstes son cuertes e non dan guaire informacion. Insistiram en aguesti ahèrs, donques sabem que son importants entà molti vesins e vesies de Les. Les auetz acieu: Respòsta der ajuntament as preguntes de Corròp

Mocions e preguntes entath pròplèu Plen deth deluns 21 de seteme de 2015

Eth grop municpau CORRÒP-LES a entrat en registre der Ajuntament de Les ua sèrie de mocions e preguntes entath pròplèu Plen deth deluns 21 de seteme de 2015. An estat eth resultat deth trabalh de toti aqueri que vien entàs nòstes assemblades, mès tanben auem recuelhut es preocupacions des vesins e vesies de Les que mos an vengut a cercar. Son es que seguissen:

 

1. MOCION ENTARA MILHORA DERA TRANSPARÉNCIA E DERA INFORMACION AS CIUTADANS DER AJUNTAMENT DE LES.

 

2.  MOCION ENTARA ARTURADA DETH PROJÈCTE DE CIRCULACION DE MOTOS D’ENDURO ENES BÒSQUI E CAMINS DE LES.

 

3.   MOCION DE SUPÒRT AS REFUGIADI QUE HUGISSEN DE SIRIA E D’AUTI CONFLICTES ARMADI.

 

4.     UA PREGUNTA SUS ES PARCATGES E ERA MOBILITAT.

 

5.     UA PREGUNTA SUS ERA MANTENENÇA DES AIRAUS INFANTIUS.

 

6.     TRES PREGUNTES SUS ETH PROJÈCTE D’AMPLIACION DERA PEIRÈRA

Les podetz consultar en aguest ligam: Mocions seteme 2015

Eth pròplèu dimenge 20 de seteme, abantes deth Plen, i aurà lòc un auta assemblada dubèrta entà decidir eth vòt e es comentaris as mocions que presente er equip de govèrn e er aute grop municipau (CDA).

Amassada damb eth Síndic d’Aran: eth fuerte, era escòla d’ostalaria e er enduro en Les

Amassada damb eth Síndic d’Aran: eth fuerte, era escòla d’ostalaria e er enduro en Les

 

Despús des reiterades queishes de vesins e toristes sus er estat deth parc deth “fuerte” de Les anèrem, prumèr, a demanar informacion sus er estat der ahèr en Ajuntament de Les, que mos informec qu’auie enviat ua carta ath Conselh Generau d’Aran, propietari des terrens, entà qu’aguest accelère es trabalhs de limpiesa e reconstruccion der equipament.

Desde CORRÒP ja auem manifestat tot soen era nòsta voluntat de dialòg e de trabalh entà establir/recuperar es pònts de comunicacion e cooperacion entre era administracion locau e eth govèrn d’Aran, ei pr’amor d’aquerò que dimercles 5 d’agost mos amassèrem damb eth Sr. Carlos Barrera, Síndic d’Aran, en Vielha.

En ordre deth dia plantegèrem 3 ahèrs importants entath pòble, ahèrs que formen part deth programa electorau que mos comprometèrem a complir enes passades eleccions:

1.    Er estat deth parc deth “fuerte”;

2.    Era escòla d’ostalaria e es edificis cedits pera Generalitat de Catalonha ath Conselh Generau d’Aran;

3.    Eth projècte d’enduro presentat en CGA a peticion des Ajuntaments de Les e Canejan.

 

1. Parc deth “fuerte” de Les

Er equipament se tròbe en un estat lamentable despús des aiguats deth 2013. I manquen es baranes de seguretat e era èrba a posat enquià hèr impracticables es terrens de jòc entara mainadèra. Damb era arribada dera tempsada d’estiu diuèrsi toristes s’an queishat as otèls deth pòble deth sòn estat. Mares e pares, vesies e vesins de Les, hè temps, 2 ans, que se queishen d’auer perdut un equipament entath pòble.

Eth Síndic, mos expliquèc que sonque hè 2 mesi qu’era Generalitat auie cedit er espaci ath CGA, e qu’era partida pressupòstaria entà apariar er equipament serà lèu dada (corresponenta ara assegurança crobada pes aiguats).

Se comprometèc a començar es òbres antes de finaus deth mes d’agost. Aguestes òbres includisen trabalhs d’ajardinament, era construccion d’ua paret de pèira entà separar eth parc des jardins e era restitocion des proteccions ath cant der arriu Garona. Ara seguida, un còp apariat, ei era voluntat deth CGA cedir er espaci ath pòble de Les.

Eth grop municipau de CORRÒP-LES demanèc auer informacion sus era auança des gestions entà transméter-la as vesies e vesins deth pòble.

 

2. Escòla d’Ostaleria e edificis annexes

Demanèrem peth projècte qu’eth CGA a previst enes edificis A e B deth conjunt qu’aué aucupe en part er Institut d’Ostalaria d’Aran. Se ben hè un temps i auie un projècte entara implantacion d’estudis de fisioterapia, a peticion dera Universitat de Girona, ara madeish aguesta institocion ja non i é interessada.

Eth CGA a contactes damb era Universitat de Lhèida entara dubèrtura d’estudis relacionadi damb eth torisme, era montanha e es servicis, mès non i a cap projècte concretat encara.

Eth grop municipau de CORRÒP-LES demanèc auer informacion de prumèra man e poder participar en procés de decision sus eth futur des edificis.

 

3. Projècte d’enduro enes camins de Les

Auiem coneishença deth projècte desde hè quauqui mesi, mès ei sonque despús dera nòsta entrada en Ajuntament de Les qu’auem sabut qu’en passat mandat eth Plen de Les aprovèc per unanimitat un projècte entà permeter era circolacion de grups d’enduro pes camins de Les. Aguest acòrd se transformèc en un projècte que s’a enviat ath CGA e qu’ara ei en fase d’estudi entà veir es afectacions qu’aguesta activitat grupau pòt auer entara poblacion, es camins e era fauna e flora de Les.

Desde CORRÒP-LES pensam qu’aguesta activitat ei deth tot incompatible damb eth torisme familiar, er excorsionisme, es activitats de descubèrta dera natura e eth trailrunning, activitats qu’ara per ara formen part dera aufèrta deth pòble de Les e pes que s’apòste coma activitats de futur entà desestacionalitzar eth torisme e trencar era dependéncia damb eth comerç e eth torisme de termièra.

Eth CGA mos facilitarà ua amassada damb es tècnics ambientaus entà veir es afectacions. Auem tanben entrat ua sollicitud en Ajuntament de Les entà consultar tota era informacion deth projècte.

Aguest serà sens dubte, un des ahèrs der ordre deth dia dera pròplèu Assemblada dubèrta, qu’aurà lòc eth dimenge 23 d’agost pera tarde, e ara que vos convidam a díder era vòsta.

 

Era amassada damb eth Síndic acabèc damb er acòrd de hèr amassades periodiques entà tractar ahèrs que preocupen ath pòble e entà recuperar canaus de comunicacion normaus, de tu a tu, entre eth pòble e eth govèrn d’Aran.